" စီစီ နိုင်ငံသား တာဝန်ကျေခဲ့ပြီ..."

(ဧရာဝတီသတင်းစာမျက်နှာမှ တဆင့်ကူးယူဖော်ပြပါသည်။)

ရွေးကောက်ပွဲနေ့မှာ စောင့်ကြည့်သူတယောက်အဖြစ် ပထမဆုံးလုပ်ရတော့မှာမို့ စီစီ ရင်တွေအရမ်းခုန်နေတယ်။ ရင်ဖုံးအင်္ကျီလေး နဲ့ ရိုးရိုးလေး မြန်မာဆန်ဆန် ဝတ်မယ်ဆိုပြီး မတိုင်ခင် နှစ်ရက်လောက်အလိုမှာ အမြန်ကြေးပေးပြီး အပ်ထားခဲ့ရတာ။ အင်္ကျီလည်းရပြီ။ လေ့လာ စောင့်ကြည့်ဖို့ သက်သေခံ ကတ်ပြားလည်း ရပြီ။

ဒါပေမယ့် စီစီ့ စိတ်ထဲမှာ တမျိုးပဲ၊ စိုးရိမ်ကြောက်ရွံ့စိတ်တွေ ဖြစ်ပေါ်နေတယ်။

“လူကြီးတွေနဲ့လည်း အလုပ်လုပ်ရမယ်။ အများနဲ့ ဝင်ဆံ့အောင်လည်း လုပ်ရတော့မယ်။ ကိုယ်က သူများတွေလိုလည်း မဟုတ်ဘူး ဆိုတော့။ အဲဒီနေ့မတိုင်ခင် ညက အရမ်းကိုစိတ်ပူခဲ့ရတာ…”

စီစီက ရွေးကောက်ပွဲမတိုင်ခင်ညက စိတ်လှုပ်ရှားလွန်းပြီး အိပ်မပျော်ဖြစ်ခဲ့ရတဲ့အကြောင်းတွေကို ပြန်ပြောပြနေတာပါ။ စီစီ စိတ်လှုပ် ရှားမယ်ဆိုလည်း စိတ်လှုပ်ရှားစရာပါ။ ဘာကြောင့်လဲဆိုတော့ စီစီဟာ လူအများရဲ့ချောင်ထိုးခြင်းကို ခံရလေ့ရှိတဲ့ ဂေး(Gay) အသိုင်းအဝိုင်း ထဲက တယောက် ဖြစ်နေလို့ပါပဲ။

အခု၂၀၁၅ ခုနှစ် ရွေးကောက်ပွဲဟာ အရောင်အသွေးစုံလင်လှတဲ့ ရွေးကောက်ပွဲဖြစ်ခဲ့တယ် ဆိုတာကတော့ ငြင်းလို့မရနိုင်တဲ့အချက် ပဲ ဖြစ်ပါတယ်။ စီစီတို့လို လူတွေအနေနဲ့ ပါဝင်ခွင့်တွေ ရလာတယ်။ ဘယ်အချိန်၊ ဘယ်ရွေးကောက်ပွဲမှာမှ အခုလို ပါဝင် စောင့်ကြည့် ဖို့ဆိုတာ အခွင့်အရေး မရှိခဲ့ပါဘူး။ အခုရွေးကောက်ပွဲမှသာ ပါဝင်နိုင်ခဲ့ကြတာပါ။

ရွေးကောက်ပွဲနေ့မှာ အကောင်းဆုံးစောင့်ကြည့်ရေးလုပ်ငန်းတွေ လုပ်နိုင်ဖို့ ‘စီစီ’ ဟာ ကြိုတင်ပြင်ဆင်မှုတွေ အများကြီး လုပ်ခဲ့ရ တယ်။ အချိန်တွေ ပေးခဲ့ရတယ်။ ရွေးကောက်ပွဲမတိုင်ခင်နေ့မှာ စောင့်ကြည့်ရေးလုပ်သူတွေအတွက် ပေးတဲ့ သင် တန်းတက်ခဲ့ရ တယ်။ မဲရုံ တာဝန်ရှိသူတွေရဲ့ တာဝန်ဝတ္တရားတွေနဲ့ပတ်သက်ပြီး စာတွေဖတ်ရတယ်။ မဲရုံတာဝန်ရှိ သူတွေ အကြောင်း သိထားမှသာ ကိုယ်က ပြန်လည် ထောက်ပြနိုင်မှာကြောင့် သေချာဖတ်ထားရတာပါ။

ပြင်ဆင်တဲ့နေ့တွေကတော့ သိပ်ကြီး ပင်ပန်းလှချည်မဟုတ်ပေမယ့် ရွေးကောက်ပွဲနေ့ကတော့ အရမ်းကိုပင်ပန်းလွန်းလှတယ်။ ဒါပေမယ့်လည်း ဒီလို သတင်း အချက်အလက်တွေကို စောင့်ကြည့်ပြီး ပေးခွင့်၊ ရေးခွင့်၊ တင်ပြခွင့်ရခဲ့တဲ့အတွက် အရမ်းဝမ်းသာတယ်။ ပီတိဖြစ်တယ်။ အမှန်တရားဘက်က ရပ်တည်နိုင်ခဲ့တဲ့အတွက် ကျေနပ်တယ်လို့ စီစီက ပြောတယ်။

ဟုတ်ပါတယ်၊ ရွေးကောက်ပွဲနေ့မှာ စီစီဟာ အရမ်းကို ပင်ပန်းခဲ့တယ်။ မနက် ခြောက်နာရီကနေ နောက်တနေ့မနက် သုံးနာရီအထိ မန္တလေး ဝန်းကျင်က မဲရုံတွေကို စောင့်ကြည့်လေ့လာမှုတွေ ပြုလုပ်ခဲ့လို့ပါ။ တနေကုန်နဲ့ တညလုံး စုစုပေါင်းရင် မဲရုံပေါင်း ၂၀ လောက် အထိ လေ့လာမှုတွေ လုပ်နိုင်ခဲ့တယ်။ မဲရုံ တရုံချင်းစီကို မိနစ်နှစ်ဆယ်၊ အစိတ်လောက် လိုက်လေ့လာတယ်။ သူလိုလူ နှစ်ယောက်၊ ယောကျာ်းလျာတယောက် စုစုပေါင်းလေးယောက် ဆိုင်ကယ်နှစ်စီးနဲ့ အတူတူလေ့လာခဲ့ကြတာပါ။

မဲရုံ တရုံချင်းစီမှာ တာဝန်ထမ်းဆောင်နေတဲ့ မဲရုံ ဝန်ထမ်းတွေ လိုက်နာရမယ့် စည်းကမ်းနဲ့ ညီညွတ်သလား၊ ရွေးကောက် ပွဲကော်မရှင် က ထုတ်ထားတဲ့ ဥပဒေတွေနဲ့ရော ညီညွတ်သလား ဆိုတာတွေကို ပထမအချက်အနေနဲ့ ကြည့်တယ်။ မဲရုံတွေမှာ ပုံမှန်မဟုတ်တဲ့ အနေအထားလေးတွေ တွေ့ရသလား၊ ပဋိပက္ခဖြစ်နိုင်တဲ့ အနေအထားတွေ ဖြစ်ခဲ့သလားဆိုတာ စောင့်ကြည့်တာတွေ လုပ်ခဲ့ပါတယ်။ မနက် ခြောက်နာရီကနေ ညနေလေးနာရီ မဲပေးလို့ရတဲ့ အချိန်အထိ မှတ်မှတ်ရရ မဲရုံ ၁၈ ရုံ လောက်ကို သွားကြည့်ဖြစ်ခဲ့တယ်။ မဲရေတွက်တာကို ကြည့်တာက နှစ်ရုံဆိုတော့ စုစုပေါင်း ရုံပေါင်း၂၀ ပါ။

ရွေးကောက်ပွဲနေ့မှာ စီစီ လုပ်ခဲ့တာတွေကတော့ ဒီအစီစဉ်နဲ့ပါ။ မနက် လေးနာရီခွဲလောက်မှာ အိပ်ရာက ထတယ်။ မိန်းမပုံ လိုမျိုး ဝတ်သွားဖို့ စီစဉ်ထားတဲ့အတိုင်း ပြင်ဆင်စရာရှိတာ ပြင်ဆင်တယ်။

ဒီနေရာမှာ စီစီရဲ့ ပုံစံကို ပုံဖော်ပြချင်ပါတယ်။ အသက်၂၂နှစ်အရွယ် စီစီဟာ ကချင်သွေး စပ်တာကြောင့် အသားအရေရော၊ ဟန်ပန် လှုပ်ရှားပုံ၊ လေယူလေသိမ်း စကားပြောပုံတွေဟာ မိန်းမတယောက်နဲ့ အရမ်း နီးစပ်လွန်းလှပါတယ်။ တော်ရုံ တန်ရုံ လူဆို မိန်းမ အစစ်လို့ပဲ ထင်ကြမှာပါ။

တခြားလူတွေလို အရမ်းကြီး နွ့ဲတာမျိုးလည်း မရှိဘဲ ခပ်တည်တည် နေတတ်တာကြောင့်လည်း ရင့်ကျက် တည်ငြိမ်တဲ့ မိန်းမသား တယောက် ပုံစံမျိုး ထင်ဟပ်နေတယ်။

တနေကုန်အောင် မဲရုံတွေကို လှည့်ပတ်ကြည့်ရှုခဲ့တာတောင် သူ့ကို ဘယ်သူကမှ မရိပ်မိခဲ့ကြဘူး။ လည်ပင်းမှာ ချိတ်ဆွဲထားတဲ့ ကတ်ပြားမှာ ရေးထိုးထားတဲ့ စီစီ ရဲ့တိုင်းရင်းသား အမည်ကြောင့် ဦး၊ ဒေါ် ခွဲမရ ဖြစ်ခဲ့တယ်။

အကုန်လုံးကလည်း “ဆရာမ..ဆရာမ နဲ့၊ ကျမ ကလည်း ခပ်တည်တည်ပဲ။ မြန်မာပုံနဲ့ ရင်ဖုံးနဲ့ ဆိုတော့ တည်တည်နေရတာပေါ့။ ကိုယ့်ကို ရိပ်မိအောင်လည်း မနေဘူးကိုး”လို့ စီစီက သဘောတကျ ပြန်ပြီး ပြောပြတယ်။

စီစီ တကယ်အခက်တွေ့တာကတော့ ရပ်ကွက်ရုံးမှာ ကြိုတင်မဲပေးတဲ့ အချိန်မှာပါ။

“ရပ်ကွက်ထဲမှာကျ ကိုယ့်ကို သိနေကြတာကိုး။ မိန်းမပုံနဲ့ ကြိုတင်မဲသွားပေးတော့ ဦးစီစီဆိုပြီး အော်ခေါ်တော့ အရှက်တွေ့ရတာပေါ့။ ကိုယ်က ဝတ်ထားတာ မိန်းမပုံကြီးနဲ့ ဦးတပ်ခံရတာဆိုတော့ အများရဲ့အာရုံစိုက်မှုကိုလည်း ခံလိုက်ရတာပေါ့၊ လှောင်ပြောင် သရော် ခံရတာပေါ့”တဲ့။

ဒါပေမယ့်လည်း စီစီဟာ လေ့လာစောင့်ကြည့်တဲ့ အခါမှာတော့ အကောင်းဆုံး စောင့်ကြည့်သူအဖြစ် တာဝန်ကျေခဲ့ပါတယ်။ စီစီဟာ သူ့ကိုယ်သူ ဝါရင့်လေ့လာသူကြီးတဦးလို သဘောထားပြီး ကိုယ်စောင့်ကြည့်ခဲ့တယ်ဆိုတာ သူပြန်ပြောတဲ့ စကားတွေထဲကနေ သိခဲ့ ရတယ်။

သူပြောတာက “လေ့လာသူဆိုတာ ဘယ်ပါတီ ဘယ်အဖွဲ့အစည်းဘက်မှ မလိုက်ရဘူး ကြားနေဝါဒအနေနဲ့ပဲ နေရတယ်။ ရှင်းရှင်းပြော ရင် NLD လမ်းမမှန်တာ လုပ်ရင်လည်း ကျမတို့က ရေးရမှာပဲ၊ ဘယ်သူပဲ လုပ်လုပ် ရေးရမှာပဲ”တဲ့လေ။

ရွေး ကောက်ပွဲနေ့မှာ စီစီ စောင့်ကြည့်ပြီး မှတ်တမ်းတင်နိုင်ခဲ့တဲ့အချက်တွေက ဆယ်ချက်လောက်ရှိခဲ့တယ်။ သိသာထင်ရှားတဲ့ အချက် တွေကို အခုလို ပြန်ပြောပြတယ်။

“မှတ်မှတ်ရရ အမှတ် ၈ ကျောင်းထဲက မဲရုံမှာ တိုင်းဒေသကြီးအတွက် ပေးရမယ့် မဲလက်မှတ်စာအုပ်က ပြည်သူ့လွှတ်တော်ကို ပေး ရမယ့် မဲလက်မှတ်စာအုပ် ဖြစ်နေတာ တွေ့ခဲ့ရတယ်။ (စာအုပ်ချင်း လွဲနေတာပါ) ဒီလိုဖြစ်နေတာတွေကို မဲရုံဝန်ထမ်းတွေက မသိကြ ဘဲ မဲလာပေးတဲ့ သူတယောက်က ပြောမှသိကြတာမျိုး၊ အဲဒီလိုသိတော့ စာအုပ်ကတဝက် ကျိုးနေပြီ၊ အဲဒီလို သတိကောင်းတဲ့ မဲဆန္ဒရှင်ရဲ့ ကုတ်နံပါတ်တော့ စိတ်ထဲ မှတ်ထားလိုက်တယ်။ နာမည်လည်း မှတ်မိသေးတယ်”လို့ စီစီ က သူ့ရဲ့ရှေ့မှာ ရှိနေတဲ့ သူ့ရဲ့လေ့လာစောင့်ကြည့်ရေး လည်ဆွဲကတ်ပြားကို တချက်ကောက်ကိုင်လိုက်ရင်း တက်တက် ကြွကြွ ပြောနေတယ်။

“နောက်တရုံမှာကျ ကြိုတင်မဲစာရင်း ဘယ်လောက်ရှိလဲ မေးတာကို မဖြေနိုင်တာ တွေ့ရတယ်။ တရုံမှာကျ မဲပေးတဲ့သူတွေကို ပါတီ ဝင်တွေက ဘယ်လိုမဲပေးဖို့ ဝင်ရောက်စွက်ဖက်သလို လုပ်နေတာမျိုးကြုံခဲ့ရတယ်”

“နောက်တချက်က မဲရေတွက်နေချိန်မှာ လူတွေအများကြီး အလျှိုလျှိုဝင်လာကြတာ၊ အများကြီးဆိုတော့ နောက်ပိုင်းမှာ မသမာမှုတွေ လို တခုခုဖြစ်လာနိုင်တာမျိုးတွေ ရှိတာပေါ့”

“မဲရုံက ကျဉ်းနေပြီး လူက အရမ်းများတော့ သွားရလာရခက်တာတွေ ကြုံရတယ်။ မသန်စွမ်းတွေ လူကြီးတွေအတွက်ဆို လာဖို့ ခက် တာ တွေ့ရတယ်”

ရွေးကောက်ပွဲနေ့မှာ သူကြုံတွေ့ခဲ့တာတွေကို မမောတမ်း တရစပ်တည်း ပြောသွားတယ်။ ပါးစပ်က စကားတွေ ပြောနေတဲ့အချိန်မှာ မျက်လုံးတွေကလည်း တလက်လက်နဲ့ တက်ကြွပြီး စကားတွေပြောနေသယောင်။

တမ္ပဝတီထဲက မဲရုံတရုံမှာဖြစ်ခဲ့တဲ့ ဖြစ်စဉ်ကလည်း ထူးထူးဆန်းဆန်းပါပဲတဲ့။ မဲပေးဖို့လာတဲ့ ကောင်လေးတယောက် မဲပေးဖို့ သက်သေခံ လက်မှတ်နဲ့လာတယ်။ ဒါပေမယ့် သူရောက်တဲ့အခါ သူ့နာမည်နဲ့ မဲလာပေးထားပြီးသားဖြစ်နေတာကြောင့် ဒီအတိုင်း မဲမပေးဘဲ ပြန်ထွက်သွားခဲ့ရတဲ့ ဖြစ်စဉ်ပါတဲ့။ ဒီဖြစ်စဉ်ကိုတော့ အဲဒီမဲရုံမှာ တာဝန်ကျတဲ့ စောင့်ကြည့်သူကတဆင့် ပြန်ပြောလို့ သိခဲ့ရတာပါ။

ဒါကတော့ မနက် ခြောက်နာရီကနေ ညနေ လေးနာရီ အထိ မဲပေးခွင့်ရှိချိန်အတွင်း စီစီ စောင့်ကြည့်ပြီး တွေ့ရှိခဲ့ရသမျှတွေပါ။

တနေကုန် မဲရုံတွေ လျှောက်ပတ်ကြည့်ရပေမယ့်လည်း လေးနာရီကျော်ရင် မဲရေတွက်တာကို ကြည့်ရတော့မှာမို့ စိတ်ထဲမှာ တက်ကြွနေတယ်။ မဲရေတာကို ကြည့်တာ နှစ်ရုံ။ ပထမရုံကနေ ညဆယ်နာရီလောက် ပြန်တယ်။ ဒုတိယမဲရုံကို ဆက်သွားတယ်။ အဲဒီမဲရုံမှာတော့ မဲရေတွက်မှု နှောင့်နှေးကြန့်ကြာတာတွေရှိခဲ့လို့ သန်းခေါင်ကျော်ပြီး နောက်တနေ့ မနက် သုံးနာရီမှ ပြန်ခဲ့ရတယ်။

မဲရေတွက်ရာမှာ စီစီ ကြည့်ရှုခဲ့တဲ့ ဒုတိယမဲရုံနဲ့ ပတ်သက်ပြီး အတွေ့အကြုံတွေကိုလည်း စီစီက အခုလို ပြန်ပြီး အားရပါးရ ဖောက် သည် ချတယ်။

“ဒုတိယမဲရုံမှာ သူတို့ လုပ်နေတာတွေကလည်း အရမ်းကြာတော့ ငြီးငွေ့လာပြီ၊ လူကလည်း တနေကုန် မတ်တတ်၊ ခြေထောက်က ဘယ်လိုမှ ရပ်လို့ အဆင်မပြေတော့ဘူး။ အရမ်းကို ပင်ပန်းနေပြီ။ မူးလဲတော့မယ်”တဲ့လေ။

တကယ်က ဒုတိယမဲရုံပြီးရင်တော့ စောစောပြန်ဖို့ဆိုပြီး စိတ်ထဲ အားတင်းလာခဲ့တာပါ။ ဒါပေမယ့် မဲရုံက နှောင့်နှေးမှုတွေကြောင့် အရမ်းကြာနေတယ်။ ရှော့လေးတွေ နည်းနည်းရှိတယ် ဆိုပြီး တခြား စောင့်ကြည့်သူတွေက သတင်းပို့လာတာကြောင့် သုံးနာရီအထိ ဆက်စောင့်နေခဲ့ရတာဖြစ်တယ်လို့ စီစီက ပွင့်ပွင့်လင်းလင်း ပြောတယ်။

မနက် သုံးနာရီထိုးချိန်မှာတော့ မဲရေတွက်တာတွေ ပြီးလုပြီးခင် ရောက်သွားပြီမို့ စီစီအိမ်ပြန်ခဲ့တယ်။ အိမ်ရောက်ရောက်ချင်း စီစီ တန်းသွားတာက သူ့ရဲ့အိပ်ရာဆီကိုပါ။ အိပ်ရာပေါ်ကို ဘုံးခနဲ တကိုယ်လုံးကို ပစ်ချလိုက်တယ်။ ပြီးတော့ မျက်လုံးလေး အသာမှိတ်ပြီး ပြုံးလိုက်တယ်။

သူ့လိုလူ တယောက်အနေနဲ့ ဒီလို အသိုင်းအဝိုင်းကြီးမှာ ဝင်ဆံ့ပြီး လုပ်နိုင်ခဲ့တဲ့အတွက် အရမ်းကို ဂုဏ်ယူတဲ့ ပီတိ အပြုံးမျိုးနဲ့ နှစ်နှစ်ခြိုက်ခြိုက်ကြီးကို ပြုံးလိုက်တာပါ။

ဒီရွေးကောက်ပွဲမှာ သူလည်း နိုင်ငံသားတယောက်အဖြစ် တတ်နိုင်တဲ့နေရာက တာဝန်ထမ်းဆောင်ခဲ့ရတာ တာဝန်ကျေရတာကို စီစီ က ဂုဏ်ယူလို့ မဆုံးနိုင်ဘဲ ဖြစ်နေပါတယ်။ ။

TOP PHOTO - (ဓာတ်ပုံ - အေးမွန်ရာပြည့် / မန္တလေး)

ရွေးကောက်ပွဲ စောင့်ကြည့် လေ့လာသူအဖြစ် ပါဝင်ခဲ့တဲ့ စီစီ

http://burma.irrawaddy.org/election/feature/%E1%80%85%E1%80%AE%E1%80%85%E1%80%AE-%E1%82%8F%E1%80%AD%E1%80%AF%E1%80%84%E1%80%B9%E1%80%84%E1%80%B6%E1%80%9E%E1%80%AC%E1%80%B8-%E1%80%90%E1%80%AC%E1%81%80%E1%80%94%E1%80%B9-%E1%80%B1%E1%80%80