လည်ပတ်စရာတွေ ပြည့်နေတဲ့ တောင်ပေါ်မြို့လေး

• By ဒီဗွီဘီ 17 January 2016 
• 
  
• မြန်မာနိုင်ငံ အင်္ဂလိပ်ကိုလိုနီလက်အောက်ကျချိန်အတွင်းမှာ အင်္ဂလိပ်တွေကိုယ်တိုင် တည်ခဲ့ပြီး ကိုလိုနီလက်ရာအဆောက်အဦးဟောင်းတွေ မပျောက်မပျက်ရှိနေသေးတဲ့ တောင်ပေါ်မြို့လေး တစ်မြို့နဲ့ ဒီတပတ်မှာ စာဖတ်သူတွေကို မိတ်ဆက်ပေးလိုက်ပါတယ်။ ကိုလိုနီခေတ်လက်ရာတွေနဲ့ တောင်ပေါ်မြို့လေးလိုဆိုလိုက်တာကြောင့် မိတ်ဆွေတွေမျက်စိထဲမှာ နာမည်ကျော်မေမြို့ (ပြင်ဦးလွင်မြို့)ကို ပြေးမြင်ကြမှာပါ။ တကယ်ကတော့ မဟုတ်ပါဘူး။
• 
  
• ရှမ်းပြည်နယ်အစပ်နားက တောင်တွေပတ်လည်ဝိုင်းထားလို့ ယောက်ချိုခွက်လေးလိုဖြစ်နေတဲ့ နေရာအခင်းအကျင်းမှာတည်ထားတဲ့ ကလောမြို့လေးအကြောင်းပဲဖြစ်ပါတယ်။
• 
  
• ကလောမြို့ဟာ အင်္ဂလိပ်တွေအချိန်အကြာဆုံးနေထိုင်သွားကြတဲ့မြို့ ဖြစ်တယ်လို့ မြို့ခံတွေက သိထားကြတယ်။ နောက်ဆုံးမြန်မာနိုင်ငံလွတ်လပ်ရေးရသွားချိန်မှာတောင် အင်္ဂလိပ်တွေဟာ ဒီမြို့လေးကနေ ထွက်မပေးသေးတာကြောင့် အနီးနားကတိုင်းရင်းသားတွေကိုယ်တိုင် ဝိုင်းဝန်း နှင်ထုတ်ခဲ့ကြရတယ်လို့ ဆိုကြတယ်။ သူတို့မစွန့်နိုင်ဖြစ်ရလောက်အောင်လည်း ကလောမြို့လေး ရဲ့ ရာသီဥတုရော၊ ဒေသပတ်ဝန်းကျင်ရော၊ ရေခံမြေခံတွေကပါ အလွန်ကောင်းလွန်းလှတယ်။ အခုလိုအေးတဲ့အချိန်တွေဆိုရင် ချယ်ရီပန်းတွေဖောဖောသီသီနဲ့ ပွင့်နေပါပြီ။
• 
  
• ကလောမြို့ဟာ ပင်လယ်ရေမျက်နှာပြင်အထက် ၁၃၂၀မီတာ (၄၃၃၀ပေ) အမြင့်မှာတည်ရှိတဲ့ မြို့ကလေးပါ။ ရန်ကုန်၊ မန္တလေးမြို့ကြီးတွေကနေ အောင်ပန်း၊ ပင်းတယ၊ တောင်ကြီးမြို့တွေဆီ အလည်သွားရင် ဖြတ်ရမယ့် လမ်းခုလတ်မြို့လေးဖြစ်ပါတယ်။
• 
  
• ကလောမြို့ကိုသွားမယ်ဆိုရင် ကား၊ ရထား၊ လေယာဉ်ပျံအစရှိသဖြင့်သွားနိုင်ပါတယ်။ ကားနဲ့ ဆိုရင်တော့ ကလောကို တိုက်ရိုက်ကားမရှိပါဘူး။ တောင်ကြီးကားတွေနဲ့လိုက်ပြီး ကလောမြို့မှာ ဆင်းနေရမှာပါ။ ရထားနဲ့ဆိုရင်တော့ ရန်ကုန်-ရွှေညောင် ရထားနဲ့လိုက်စီးခဲ့ရမှာပါ။ မန္တလေး ဘက်ကနေတော့ ရထားသီးသန့်မရှိပါဘူး။ သာစည်ဘူတာကနေ တဆင့်သွားစီးကြရဦးမှာပါ။ လေယာဉ်နဲ့ဆိုရင်တော့ ဟဲဟိုးလေဆိပ်ကနေတဆင့် ကလောမြို့ကို ကားနဲ့ထပ်လာကြရမှာပဲ ဖြစ်ပါတယ်။
• 
  
• ပြည်တွင်းခရီးသွားတချို့ကတော့ ဖြတ်သွားဖြတ်လာမြို့အဖြစ်လောက်သာ ကလောမြို့ကို စိတ်ဝင်စားကြပါတယ်။ တကယ် ကလောမြို့တွင်းကို နှံ့နှံ့စပ်စပ် လေ့လာလည်ပတ်သူတွေကတော့ နိုင်ငံခြားသားတွေပါ။
• 
  
• ကလောမြို့နဲ့အနီးတဝိုက်က ပင်းတယ၊ ရွာငံ၊ အင်းလေး အစရှိတဲ့နေရာတွေကို တောကြမ်း လမ်းလျှောက်ဖို့ အခွင့်အရေးတွေအများကြီးရှိတာကလည်း နိုင်ငံခြားသားတွေကို စွဲဆောင်ထားသလို ဖြစ်နေတယ်လေ။
• 
  
• ကလောမြို့လို့ ဆိုလိုက်တာနဲ့  နိုင်ငံခြားသားခရီးသည်တွေဟာ တောကြမ်းခရီးသွားတာတွေကိုပဲ အဓိကတွဲမြင်လေ့လရှိကြတယ်။ ကလောမြို့ကနေ တစ်ညအိပ် ၂ ရက်၊  ၂ ညအိပ်သုံးရက်နဲ့ နေ့ချင်းပြန်ဆိုပြီး တောလမ်းခရီးစဉ်လမ်းကြောင်းအမျိုးမျိုးရှိတယ်။ ကလောကိုအခြေခံပြီး ခရီးအကွာအဝေးမိုင် ရေတွက်မယ်ဆိုရင် အင်းလေးအထိ ၄၂ မိုင်၊ ပင်းတယအထိ ၄၁ မိုင်၊ ရွာငံအထိ- ၃၄မိုင် အသီးသီးရှိပါတယ်။ လမ်းတလျှောက်က  ပအိုဝ်း၊ ပလောင်၊ တောင်ရိုးဓနု စတဲ့ဒေသခံတိုင်းရင်းသားတွေရဲ့ရွာတွေနဲ့ သူတို့အဓိကစိုက်ပျိုးနေကြတဲ့ မက်မန်းခြံတွေ၊ လိမ္မောခြံတွေ၊ လက်ဖက်ခြံတွေကို လေ့လာကြရတာကို နိုင်ငံခြားသားတွေက မက်မောကြတယ်။
• 
  
• ကလောမြို့ဧရိယာထဲမှာတော့ နိုင်ငံခြားသားတွေ အများဆုံးလေ့လာကြတာက ကလောဘူတာရုံ ပါ။ အင်္ဂလိပ်တွေတည်ခဲ့တဲ့ ကလောဘူတာရုံမှာ ၁၉၁၆ ခုနှစ်ကစပြီး ရထားပြေးဆွဲ ခဲ့တာကြောင့် အခု၂၀၁၆ ခုနှစ်မှာဆိုရင် ဒီဘူတာဟာနှစ်တစ်ရာပြည့်ပါပြီ။ ကလောဘူတာကိုတော့ နိုင်ငံခြားသား တွေရော၊ ပြည်တွင်းက စိတ်ပ်ဝင်စားသူတွေပါ မကြာမကြာလာပြီး လေ့လာကြတယ်။ ဓာတ်ပုံရိုက် ကြတယ်။ ကလောဘူတာဟာ ကလောမြို့မဈေးရဲ့ အရှေ့တောင်ဘက်ကျကျလောက်မှာပါ။
• 
  
• ကလောဘူတာလိုပဲ သက်တမ်းရင့်အဆောက်အဦတွေ ကလောမြို့ထဲမှာ အများကြီး ရှိနေသေး တယ်။ အရေအတွက်အတိအကျသိချင်လို့ ဒေသခံတချို့ကို မေးမြန်းကြည့်တယ်။ သေချာရေတွက် ကြည့်မယ်ဆိုရင် အဆောက်အဦးတွေ အရေအတွက်တစ်ရာလောက်ရှိမယ်လို့ ဆိုကြတယ်။
• 
  
• ကိုလိုနီလက်ရာအထင်အရှားကျန်တဲ့ အဆောက်အဦးတွေကတော့ လက်ရှိကလောဟိုတယ်ပါ။ ဒီကလောဟိုတယ်ကို ၁၉၀၆မှာ တည်ဆောက်ခဲ့တာပါတဲ့။ ပြီးရင် Amara resort၊   Kalaw Hill Lodge villa တို့ဟာ ရှေးတုန်းကအဆောက်အဦးတွေကို ပြန်ပြုပြင်ထားတာတွေပဲ ဖြစ်ပါတယ်။
• 
  
• အင်္ဂလိပ်ခေတ်ကလက်ကျန် ဆေးရုံဟာလည်း ကလောမြို့မှာ ဒီနေ့အထိ ရှိနေသးတယ်။ ဒါပေမယ့် လက်ရှိအချိန်မှာ စစ်ဆေးရုံလုပ်ထားပါတယ်။ ကနောင်ဆောင်ဆိုတဲ့ အမည်နဲ့ပါ။
• 
  
• ကျန်တဲ့မထင်မရှားအဆောက်အဦးတွေကတော့ လူနေရပ်ကွက်တွေထဲမှာ မြုပ်နေတယ်။ ကလောဒေသခံတွေဟာ သူတို့ရဲ့ဘိုးဘွားဘီဘင်ကအဆောက်အဦးတွေကို ထိခိုက်လိုစိတ် မရှိကြပါဘူး။ မူရင်းအဆောက်အဦးကို မူရင်းအတိုင်းပဲ ထားကြတယ်။ သူတို့ ကိုယ်တိုင်ကတော့ ခြံလုပ်ငန်းလုပ်ကိုင်စားသောက်ပြီး တဲနဲ့သာ နေရင်နေမယ်။ သူတို့ပိုင်တဲ့ အဆောင်အဦကြီးတွေ ကိုတော့ ပြန်လည်ရောင်းချတာမျိုး၊ ငှားတာမျိုးဆိုတာ မလုပ်ကြပါဘူး။
• 
  
• ကလောမြို့ဟာ ရှှုခင်းကြည့်စရာ အင်မတန်ကောင်းလွန်းလှတဲ့မြို့လည်း ဖြစ်တယ်။ တချို့အလွမ်းဓာတ်ခံ ရှိသူတွေဆိုရင်တော့ လွမ်းစရာကောင်းတဲ့မြို့လေးအဖြစ်လည်း ခံစားနိုင်မှာပါ။ ကလောမြို့လေးကို မြေပြင်အနိမ့်အမြင့်အတက်အကျတွေပေါ်မှာတည်ထားတာဖြစ်လို့ ဖြတ်သွားဖြတ်လာ ကြည့်လိုက်မိရင် တချို့အိမ်တွေက လမ်းရဲ့အောက်မှာရောက်နေပြီး တချို့အိမ်တွေက တောင်ပေါ်မှာရောက်နေသလို ဖြစ်နေတယ်။ တချို့အိမ်တွေကတော့ တောင်ကမ်းပါးယံလေးမှာ တည်းတည်းလေးဆောက်ထားသလိုမျိုး၊ ဒီအိမ်တွေကိုသွားဖို့အတွက် တောင်ကမ်းပါးမှာ လှေကားထစ်လေးတွေဖော်ထားသေးတယ်။ ဒါကိုက ကလောမြို့ရဲ့ အမှတ်သင်္ကေတလေး တစ်ခုလိုဖြစ်နေတယ်။
• 
  
• ကလောမြို့နဲ့အနီးနားမှာ ပြည်တွင်းခရီးသွားတွေ လည်စရာနေရာတွေလည်း အများကြီးပါ။ ရွှေဥမင်ဂူဘုရား၊ နှီးဘုရား၊ သိမ်တောင်ဘုရား၊ အောင်ချမ်းသာဘုရား၊ ဆုတောင်းပြည့်ဘုရားတွေ ရှိတယ်။ သိမ်တောင်ကျောင်းပေါ်ကနေကြည့်ရင် ရှုခင်းတွေအရမ်းလှတယ်လို့ဆိုကြတယ်။ ပြည်တွင်းက အဖွဲ့လိုက်ခရီးသွားကြတဲ့ ခရီးသည်တွေအနေနဲ့ နှီးဘုရားမှာ အခမဲ့တည်းခိုနိုင်တယ်။
• 
  
• ပြည်တွင်းက ဧည့်သည်တွေ ကလောမြို့ရောက်ပြီဆိုရင် မလုပ်မဖြစ်လုပ်ကြတာကတော့ ရှော့ပင်း(ဈေးဝယ်)ထွက်တာပဲ။ ကလောမြို့မဈေးထဲမှာ ဒေသထွက်ပစ္စည်းတွေ၊ အိတ်ကြီးအိတ်ငယ် အသွယ်သွယ်နဲ့ ဝယ်ကြတယ်။ တချို့ကကျတော့ ကလောမြို့ကိုရောက်ပြီဆိုရင် မြို့မဈေးထဲက စားသောက်တန်းကိုမဖြစ်မနေသွားပြီး ဟင်းထုပ်တို့၊ ငါးထမင်းနယ်၊ ဝက်သားချဉ်၊ တို့ဟူးကြော်၊ တို့ဟူးနွေး စတဲ့ ဒေသစာတွေ စားကိုစားလိုက်ရမှ။
• 
  
• မြို့မဈေးရဲ့အရှေ့ဘက်မှာ ငါးရက်ကို တစ်ကြိမ်ကျင်းပတဲ့ ကလောဈေးနေ့နဲ့ဆုံရင်တော့ တိုင်းရင်းသားတွေကိုယ်တိုင် လာရောက်ရောင်းချတဲ့ လတ်ဆတ်ကော့ပျံနေတဲ့ ဟင်းသီးဟင်းရွက် တွေနဲ့ ကြုံကြရမယ်။ သူတို့တွေကို မဝယ်ဝယ်အောင်ကို ဟင်းသီးဟင်းရွက်တွေက အပြိုင်အဆိုင်စွဲဆောင်နေလိုက်ကြတာ ဈေးနေ့နဲ့ကြုံဖူးဆုံဖူးသူတွေသာ သိနိုင်မှာပါ။
• 
  
• ကလောမြို့ကလေးဟာ ပြည်တွင်းပြည်ပကလာရောက်ကြတဲ့ ဧည့်သည်တွေအတွက် ခဏတဖြုတ်လာရောက် အပန်းဖြေစရာ မြို့ကလေးဖြစ်တာကြောင့် ခရီးသွားရာသီတွေမှာတော့ နိုင်ငံခြာသားတွေရော၊ ပြည်တွင်းကခရီးသွားအဖွဲ့တွေနဲ့ပါပြည့်ပြီး စည်ကားနေတတ်တယ်။ ကျန်တဲ့ကာလတွေမှာတော့ ခရီးသွားတွေ တဖြောက်ဖြောက်သာရှိတယ်။ ခရီးသွားရာသီမဟုတ်တဲ့ အချိန်တွေမှာတော့ ပုံမှန်စိုက်ပျိုးရေးလုပ်ငန်းတွေလောက်သာ အလုပ်ဖြစ်ကြတယ်။ စိုက်ပျိုးရေးအဓိကလုပ်တဲ့ ကလောမြို့ကနေ ဟင်းသီးဟင်းရွက်တွေ အများဆုံးထွက်တယ်။
• 
  
• ဟင်းသီးဟင်းရွက် သစ်သီးဝလံတွေပြီးရင် နောက်တခု ကလောမြို့ကနေ အထွက်အများဆုံး ကတော့ ဗိုလ်ချုပ်တွေပါပဲ။ ဟုတ်ပါတယ်။ ကလောမြို့မှာ စစ်ဦးစီးတက္ကသိုလ်ရှိလို့ ကလောမြို့ပေါ်မှာ စစ်ဘက်ဆိုင်ရာအရာရှိတွေရဲ့ စစ်ကားတွေကို မကြာခဏတွေ့ရတတ်ပါတယ်။
• 
  
• နောက်ထပ်အပေါဆုံးအရာတွေကတော့ အမျိုးစုံလင်လွန်းလှတဲ့ တည်းခိုစရာနေရာတွေပါ။ အင်း၊မိုတယ်တွေကအစ ဟိုတယ်တွေ၊ resort တွေ အရောင်အသွေးမျိုးစုံပဲ။ ပြီးတော့ စားသောက်ဆိုင်တွေ အများမှ အများ ကြီးပါပဲ။
• 
  
• ရန်ကုန်၊ မန္တလေးမြို့ကြီးတွေနဲ့လည်း သိပ်မဝေးလွန်းမနီးလွန်း၊ နေရထိုင်ရတာကလည်း သက်တောင့်သက်သာဖြစ်၊  ရှုခင်းရှုကွက်တွေလည်းလည်းအရမ်းကောင်း၊ ရာသီဥတုကလည်း သာယာလွန်း…စတဲ့ ဂုဏ်ပုဒ်များစွာနဲ့ပြည့်စုံနေတဲ့ ကလောမြို့လေးဟာ မြန်မာပြည်ထဲက တကယ့်အဖိုးထိုက်တန်တဲ့ရတနာလေး တပါးလိုကို ဖြစ်နေပါရဲ့….။
• 
  
• အေးမွန်ရာပြည့်
• 
  
• http://burmese.dvb.no/archives/131269